لقاء مع جكسوية معذبة الشعب السوداني كلو !!
بعد ان ســــــــاد الهــــدواء ...
* انت منو؟
ـ انا الماشافوها كرهوها والسمعوها نبذوها انا الباعوضه بتقرص والنوناي السامعو دا انه صوتي انا.
* اسم الشهرة او الدلع؟
ـ انثى الانوفليس، سيده وجمالها فريد خلقوني للتعذيب
* مسقط الرأس؟
ـ يعني البرك البلاعات المستنقعات مجاري السوق العربي وكل الدروب المعطونة بالطين والوحل.
* السكن حاليا؟
ـ الحاج يوسف والكلاكلات وراس الشيطان والدنيا حلوه وانا بحب شباب ام بدة بلا صفقة.
* المهنة؟
ـ اشيل دم من دا يمرض دا من دم دا لغاية ما يقول عندي حمى وبي صداع الم واطلع ليه ام هلا هلا في راسو ويقعد يقول انا ما عيان جيبوا لي بخور ويجنتر.
* اجمل اوقاتك؟
ـ بنمشي مشوار العصاري ونجي راجعين في المغيرب ونتجمع ساعة المساء فرد الجناح لملم مصابيح النهار، ونتكيف في عز الليل ونهوى الليل الهادي ما سمعت اللحو قال الليل بدورو الناس وانا ليلي اخاف منو ما نحن السبب.
* اللون المفضل؟
ـ بحب اي بني ادم احمر لونو جسموا ومرات السادة اللونو خمري ويا ريت لو كان لونو سمح زي الدهب ولا القمح.
* مدحة؟
ـ من بعد الليل ما جن ناس ليلى جن نحن الباعوضات ناس ليلى ذااااتن
* اجمل فصول السنة
ـ حل الخريف حلا ووحلنا فيه وحلا
* لاعب كرة قدم
ـ فاروق«جبرة» لانو دي منطقتنا المفضلة وباعوض جيده عندو جلحات ومدغلب.
* فنان سوداني؟
ـ ابو اللمين لانو قال ليلي دون الناس كلو آهات كلو آهات
* كاتب تقري ليه؟
ـ المتنبي عشان قال:
وزائرتي كأن بها امر قبض فليست تزور الا في الظلام
* شخصية عالمية؟
ـ دراكولا. اقول ليه حبيبي تعال تعال نتلم ما دام الريد اختلط بالدم.
* نقطة الضعف الوحيدة.
ـ المواطن العندو ناموسية مشبعة بس انا وراهو والزمن طويل بقول ليه لو طلعت القمرة وجيت ولو حلفت بي رب البيت ما بسيبك مهما بكيت واتمسحت بالجاز والزيت او جبت ليك علبه فليت او جريت.
* رسالة لـــــمغربي الغلبان ؟
ـ بقول ليه مستحيل عن حبك اميل بساهر الليل انا يا جميل.
* بس دا مسكين ودمو كلو «موية فول»؟
ـ ما بسيبو اقول انساه دمو يزيد تزيد من تاني اوجاعي
* باقة ورد وفانسيدار وكلوركوين لمن تهديها؟
ـ لناس مشروع الخرطوم خالية من الملاريا وديل كرهونا العيشة ومحل قبلت القاهم معاي معاي زي ضلي.
* اغنية ترددينها هذه الايام؟
ـ كلما اشوف طيارة الرش اغني واقول طيري يا طيارة وطيري قولي لعدويني لناس الصحة دورياتكم مسخت وما ها سمحة وما بتسوي لينا شي ولا حتى القحة وليك يا ولاية عظيم تقديري وطيري يا طيارة وطيييييري.
همســــة : منقول.
