الغربة الغشاشة المستهبلة

يا غربة .. يا غشاشة .. يا بكاية .. يا مستهبلة
تغرينا بي درهم قروش وراه قنطار بهدله
جيناك سنة .. أو قول سنين بنكمله
نبني البيوت في العاصمة

وبي كوم أثاث بنجمله
وكرولا حاره نرسله أصلو التنقل مشكله
ونكمل الدين بي مهل والسمحة جاهزة نحصله
غير القروش اللي الأهل عبر الشهور حا نرسلا
والباقي يدخل في البنوك ونشوف دباره نشغله
ناس فكرت تجني العلم تبدأ الدراسة تواصلا
أحلام كتيره وشيقه وآمال كبيرة نأملا
لكن حساباتنا الغلط في كل عام بنرحله
مرت سنين من العمر بنعزها وبنفضله
والحسبة وصلت طاشرات يمكن نعيش وندبلا
وتعال نحاسبك يا وهم من غير رقم أو أمثله
كان للقروش نجري ونحوش لكن تقول بنشاكلا
ما راضية تقعد في الجيوب وتقول حرامي بينشلا
لكن بترقد في الضهور بديون تقيله متلتلا
ممحوقة ما بتقضي الغرض وأقل حاجة تكملا
كملانه سفرة وحق وزن ومجاملات مستفحله
ضرائب أبعاج المشي وإلزامي حمدي نحولا
وأحلامنا صبحت زي سراب نمشي ونجري ما نحصلا
يا ريت يكون هم القروش يا غربة فيك هو المعضله
لكن تعال شوف الهموم الما إفتكرنا نقابلا
ذلة ومهانة واحتقار خلو النفوس متململة
سجنا كبير فيهو الكفيل سجان قيوده مكبله
أشغالو شاقة ومؤلمه ودايما تكون مستعجله
ما عاد يكفيها النهار تحتاج ليالي مليله
أمراض كتيره بدت معاك عايزه الفحوص مستعجله
ناس الضغط والسكري ومرض القلب مع الكلى
ومصران وقرحة وإكتئاب ونفوسنا ما متحمله
وبنينا فيك كيمان لحم تحت الهدوم متندله
وأكيد يكون أكل المعلب والمجمد عاملا
عدم الرياضة والكونديشن لابد يكون ليهم صــــــلا
وكمان تعال لمعادلة ما قدرنا أصلا نعدلا
سجن العيال جوه الشقق وفراق الأهل والعائله
جيب العيال بي جيبنا مال وجيوبنا غيرو مميله
وصغارنا صبحت بالزهج متوحشة ومتجفله
لا قادرة تلعب في خلا ولا ضل شديره يضللا
لا قادرة تدرس بي نفس من الدروس المترهله
تلقي الولد غالبو الكلام والبت كبيرة ومريله
كل الضغوط سوا ما قدرنا حتى نقللا
في كل طرف تلقي القرف تلقي الخيوط مداخله
يا غربة أديناك كتير أدينا خاطرك يسهلا
خلينا نرجع بالفضل نلحق حياتنا نعدلا
آمالنا فيك بدري إتنست إلاّ الرجول متوحله
وبقينا زي أهل القبور لا البره عارف يدخلا
لا الجوه يرجع لي ورا يحكي الحقيقة يوصلا
لكن خلاص هان الخلاص عندك نزل مهما علا
وإن شاء الله نحيا نودعك وتكوني ذكرى نغازلا
يا غربة .. يا بكاية .. يا غشاشة .. يا مستهبله
امشكلة الاغتراب عندنا نحن السودانيين بلا هدف ولاطعم ولارائحة فالواحد منا يهاجر واهله يحسبونه مغتربا لان الغربة لاكثر من خمسة سنوات تعتبر هجرة ولو الواحد منا اكرمه الله وشيد بيتا ياويه اذا عاد فان المطالب تمتد من الاسرة لشراء الاثاث والستائر وحاجات تانية قد تقوده الى زيادة من سنين الغربة قد تمتد به الى ان يحين اجله والبيت يعملوا فيه فراش البكاء ويبقى ميراث متنازع عليه فهذا هو ملخص الغربة عندنا نحن معشر السودانيين فما رايكم دام فضلكم.
بلادي وإن جارت علي عزيزه ......... واهلها وان جنوا علي كرام

عندما كنت بحاضرة الشرقية مدينة الخبر قبل أربع سنوات ((والتي انتقلت منها لرياض السعودية

اذكر أنه كان يوميا بعد صلاة المغرب أو العشاء يمر علي رجل سعودي كبير السن

وكان بمجرد دخوله بعد السلام يقول (( زين ادع لنا انتم بغربة والغربة كربة وقطعة من

نار جهنم وانتم في جهاد ودعاءكم مستجاب فلاتنسانا من صالح الدعاء))


واسأل ربي ان يردنا لبلادنا سالمين وغانمين وان يصلح بلادنا ويولي لنا حكاما صالحين


ولاشك اننا الشعب الاول الذي تطول غربته عشرات السنين ((اذا استثنينا الفلسطينيون والصوماليون)) باعتبار الاسباب السياسية تمنعهم مع الحروب ببلادهم )

بل عندما يسوء الحال وتتبدل احوال دولة الاغتراب ترفع الحكومة يدها بعدما اخذت لسنين

طوال الضرائب منا ومن تعبنا ((اليمن وليبيا والعراق ولبنان))خيرشاهد علي سوء

احوال مغتربي السودان ومتاجرة مسئولي المغتربين باسم قضاياهم

ورغم خيرات بلادنا المنهوبة فنحن مغتربين وخوفي ان يطول الاغتراب

ولد موريتان