هلالنا تجلى

هلالنا أتجلى
عبد السلام مصطفي عثمان
الرياض-10/06/2010م
يــا الـمــريـخ فـي عـقـــر دارك
هـــلال الـعــز قـــلّل مـقـــدارك
بـالـهـدفـيــن شــتــت أفـكـــارك
فــي المـمـتـاز حـطّـم إصـرارك
هــلالنا تجـلى ضياء في مدارك
ضــــوي سمــانا أفـرد أنـوارك
للقــمة فـوق واصـل مـشوارك
بالمــوج الهـادر فاضت انهارك
الــدوري المـمتاز خليهُ شعارك
يا الوالي جمــال كيفن إخـبارك
وصــّف لـيـنا بـــراكا مشاعرك
هـــذا تـــاريــخ وقّــع إقـــرارك
تيــمــك مهــزوم ورينا قــرارك
هزيـمة تقيلة إيه هي أعــذارك
حــتــرد كـيفـن بكـرة اعتــبارك
باباي كار بوني كشفنا اسرارك
حِـفظنا قريـنا خــلاص أفـكـارك
في النعش براك دقيت مسمارك
أوعـــك تقـــول جـارت اقـدارك
بالطول والعرض حددنا مسـارك
مـهنـد يا غــزال أعزف أوتارك
في المرمى مضيت سجّل مزارك
بــقــذيفة قــوية يـسلـم يــســارك
ليــلـك فــرحـنـا أسعـدنا نهـــارك
كــاريكا اوفيـــت جددت إصرارك
بـصاروخ عــابر ختــمت حوارك
أجـمل أهـــداف أهــــديتا لجــارك
من اجل النصر كامبوس أختارك
[center]

وتلك الايام نداولها بين الناس ........ يوم ليك ويوم عليك ..... ولن فرحتم فلن النصر جديد عليكم .

عــــــــــــــــــــــــــــــــــــــــــــــــــــدولي
كشفت اوراقك بالاحمر يا زول
وبعدين وين العنجهية وطبعا أرسين إختفي وكفانا الله شره بهذه الهزيمة وبعدين نحن بنتكلم بالشعر وشوف لينا واحد يقول كلام زي كلامنا طبعا مافي لاننا الهلال والزعامة والفخامة والرزانة والآداب والطب و و و و و و و و و و و و و و و و و و و و و و و و و و و و و مين تاني زيك يا الهلال إنت الوحيد غيرك محال والباقي بكرة

الف الف مبروك للاخوه الاهله وطبعا الفوز كان مستحق بمعنى الكلمه لان الاهله سعوا لها وعقبال الكونفدراليه والكادقليه والحى العربيه --الى الامام دائما ونتمنى لكم التوفيق لانكم فى النهايه فريق سودانى عريق .
وطبعا يا مريخاب نحنا ما اتغلبنا عشان الهلالاب اقويا ولعيبه وآخر حرفنه ولكن يكون معلوم لديكم باننا سوف نهزم من كل من يجرى وراء الكوره حتى لو ما كان نادى اذا لم نعمل على انهاء امرين هامين هما سبب انتكاسة المريخ الحاليه والقادمه ---
الاولى ---رفع صورة السيد الرئيس المكتسح من على الاستاد وفورا
ثانيا -- رفع يد الوالى جمال عن رئاسة المريخ ولو بانقلاب
وعندها سوف تروا العجائب من ناس العجب .
مريخابى اصيل ومشجع على السكين منذ ما يقارب الاربعه والاربعون عاما --ومازلت

الله ينجينا من فكي عبد السلام وسيداحمد وخذوا راحتكم في الغابة اقصد في الساحة حتى عودة النمر الاحمر (بكري) وحينذاك لكل حادث حديث ولكل قصيدة شعر قصيدة تماثلها اوع اروع منها والي ذلك الحين دعونا نستمتع بالمحمر والمشمر (كاس العالم) وتركنا لكم الويكة البايتة (الهلال) ولنا عودة بأذن الله ودمتم .

بكري وعادل تعلموا من حجازي وقولوا للفائز مبروك ولا اعذار وخلو بالكم الدوري الممتاز مما بدا لنا عشرة فوز بها وانتم 4 فقط والدور الثاني قريب و
شد حيلك وزي ما قال ابو السيد إتقلبت بدون ما تحس أزرق ويا ناس ألحقوا المرتدين بدون ما يدروا ومبروووووووووووووووووووووووووووووووووووووووووووووووووووووووووووووووووووووك للجميع حُمر وزُرق

ياسلام مني ليك الف احترام**وانتصار الهلال خارج صلاح من الملام

الوالي قال برضو النسب يعز**والعديل ليه الاحترام

النجم في السماءانتشروالهلال غاب ×× وده اصلو النظام

والهدفين ماهم أمان ××احسب نقاط الدوري تفهم كلام

واصلو المحارب لازم يستريح××وحتي الصلاه ركوع وقيام

والاحمر وهاج ***ولون الهلال من الظلام

ونحنا بنجمتنا نعلو××وياهلالاب قلنا لوهزمناكم حرام

هدفين ماتفرحكم كتير ××قلنا تغدو بدل الهزائم والصيام

وبتدور المجنونه××××ويااولاد صلاح قريب الامتحان

ولد موريتان

يا جماعه للاسف ولا الهلال ولا المريخ ولا حتى المنتخب القومى يستاهلوا كل هذا الكلام الجميل والبديع
لذلك نرجو من الاخوه الاكارم صناديد الكلمه المقروءه --ان تكفوا عن هذه المساجلات ونوجه اقلامنا الى حيث السودان الوطن الذى سوف تعمل ايدى آسمه على تفتيته قريبا .
طبعا يا جماعة الهلال-- دى جاتكم بارده ولكنى اقول (ارى تحت الرماد وميض نار --حمراء )
ويا بكرى شوف مين تانى من المريخاب بيتشرف بالقصر الجمهورى والرئيس الجمهورى حقكم --اما انا برئ من كل هذه الشخوص والاماكن التى ذكرتها --يا راجل المريخ يمتلك اشياء كثيره سابقا ولا حقا اكبر من ان يتشرف بهذا الرئيس المكتسح . كلامك عن المريخ عداه العيب ولكن خربتها بى حكاية القصر والرئيس --لكم الود

الاخ بكري ( أرسين لوبين )
لك تحياتي
طبعا انا تكلمت عن مباراة وانت تتكلم في شخصي
أنا كتبت قصيدة إرتجالية فرحا بالنتيجة وانت تنقد كتابي
أنا بتكلم عن الحاضر أنت تبكي على اطلال الماضي
أنا بتكلم بصدر رحب وانت ترمي جام غضبك من النتيجة في شخصي
انا بتكلم في الهلال كفريق وانت تتحدث عن مزمل وأحمد محمد الحسن وللذكري في آخر إجازة كنت في السودان وكانت إنتخابات جمعية الصحفيين على الأبواب ووضعت اللجنة التنفيذية في مقال لي بجريدة الأنباء وطلبت من جميع الزملاء ان يختاروهم بالإجماع وكان أستاذي احمد محمد الحسن رئيسا ورمضان السيد الانيق أمينا وظهرت النتيجة كما طلبت ومزمل أبو القاسم قد أشاد بديوان هلالنا فوق وكان حاضرا هنا في الرياض قبل الطبع
أنا اتكلم عن تيم ونتيجة وانت تتكلم عن أشخاص منهم من قضي نحبه ومنهم من ينتظر
أنا اتكلم عن نتيجة مباراة بتلقائية وانت تتحدث بعد الشحن والنداء طيلة ثلاثة أيام من عادل
انا اطالب كل من يرد ان يتحلى بالأسلوب وبرحابة صدر انا لم أشتم احد فقط الهزيمة مرة والقصيدة زادت المرارة ويا عادل لا تسند على حيطة مائلة
ليس الفتى من يقول كان أبي ولكن الفتى من يقول هاأنذا
مع التحية ولو كان اسلوبك بهذه الطريقة فسأعتزل المنتدى

يا شيخنا عبد السلام لو كلفت نفسك وقرأت آخر الردود والتى قمت بتحريرها وذلك ردا على اخونا بكرى لما كلفت نفسك عناء الكتابه --على فكره انا شيخ مشجعى المريخ واى واحد يفوت الحد بنوقفه (انا خايف الجماعه ينقلبوا على انا لست سوى مريخابى متمرد عشان خاطر الوالى جمال )
يـــــــــــــــــــــا عبد الســــــــــــــــــــــلام
نحنا ما صدقنا انك بى جلالك جيتنا زائر
وكيف نصدق عشان كلمه من بكور بقيت مغادر
يــــــــــــا اخواننا خلو الصحن مغطى (او كما قال محمد عبدون اريله )